تجربة احدى الأشخاص في مدينة طرابزون

تجربة احدى الأشخاص في مدينة طرابزون 

 الحمدلله رب العالمين بعد ماقضينا اسبوع في طرابزون حبيت اشاركم تجربتي المتواضعه وماهي اكثر احترافيه من تجارب  الاخوان والاخوات ومشرفين القروب وانما هي محاولة رد جميل.

كانت الرحله على طيران بيقاسوس ترانزيت عن طريق مطار صبيحه لمده ٤ ساعات
توفقنا بأنهاء اجراءات فيزة والسفر بسرعه ثم انتقلنا لصاله المخصصه بالطيران الداخلي. كانت تجربتي الاولى لطيران بيقاسوس وللاسف كان اسوء طيران جربته في حياتي بسبب ان الكراسي غير مريحه والكراسي الي جنبي كان فيها مسافرين.

بعد الوصول لمطار طرابزون كان بستقبالي موظف شركة اخذنا لمكتهم وستلمنا سياره داستر وثم اتجهنا لأوزنجول مباشرة. اثناء ذهابنا مرينا على مطعم اسمه لقمه كان لذيذ جذا تغدينا فيه واكملنا سفرنا.

وصلنا لأوزنجول بسلامه وكانت أقامتنا في Gold City Apart Hotel لمدة ٤ ليالي تم حجزه عن طريق موقع Otel Fiyat التركي بتكلفة 6000 ليرا لغرفة ستاندر.

الفندق يبعد عن البحيره ٧ دقايق بالسياره .
المنطقه هادئه لكن يوجد فيها نامس بسبب القرب من نهر. اهل الفندق كانوا لطيفيين جدا جدا جدا.

ثم انتقلنا لطرابزون لمده ٣ ليالي والاقامة كانت في شقق الحجز كان عن طريق Airbnb بتكلفة 160 دولار.

شقه مكونه من غرفه وصاله وحمام الله يعزكم. جيد جدا مستواها ويعيبها ان غرفة النوم مافيها مكيف. البنايه تبعد عن مطار طرابزون ٧ دقايق.

ثم انتقلنا طيران داخلي الى اسطنبول على خطوط التركيا وكانت ممتازه.

اقمت ٤ ليالي في فندق Olen Hotel Uskudar جميل ومكانه في الجانب الاسيوي غرفة وحمام بتكلفة 170 يورو.
موظفين الفندق كانوا متعاونين ولطيفين.

بعض المواقف والنصايح العامة الي ممكن تساعد المسافر:

⁃ تركيا بشكل عام فيها الرخيص والغالي، بتحصل كل الخيارات وكل ماكانت خياراتك مختلفه عن السواح راح تكون اوفر.
⁃ اذا كنت بتفيز بالمطار جيب معاك يورو لانه راح يكون ارخص لك من الدولار.
⁃ بخصوص اوبر في اسطنبول بتلاحظ بعض الاوقات لما تطلب سياره يكلمك عن طريق التطبيق ويحاول يفاوضك . اول مايسوي لك كذا قفل الطلب وسوي جديد ولاتضيع وقتك وياه لان بتلاقي غيره يقبل بالسعر. وبالخصوص اخر الليل يتضاربون بالاسعار ويقولك انت في وقت متاخر ماحد بيجيك ويحاول يخوفك عشان تقبل بسعره وتركب وبينما الواقع التكاسي و اوبر مليانين و حتما بتحصل.
⁃ مجمع جواهر مول كثير عليه مدح، رايي ان قديم شوي و مجمع الوادي بيكون افضل.
⁃ بخصوص استرداد ضريبه، مطار طرابزون لايوجد فيه مكتب.
⁃ تأكد من التاجر ان يدخل بيانات جوازك في الفاتوره صح. انا رفضوا فواتيري بسبب خطا في رقم الجواز المدخل
⁃ حسب تجربتي والي صار معاي، بيقسوس يدققون في وزن الشنط الشحن والكيلو الزايد قالوا لي  ب ١٤ دولار. اما شنط الي داخل الطياره والاكياس ماحد دقق عليها لا من عدد ولا من وزن.
⁃ اسطنبول كانت حاره ومشمسه بنهاية شهر ٦ وبارده ليلا. ولو اني داري هذا جوها ماكان جيتها.

وهذا كل الي اتذكره وانشا الله مانسيت شي.
وان افادتك المعلومات لاتنساني و والديني من دعائك، وان كانت غير ذلك ف العذر من الله ثم منكم.

تحياتي.