تجربة رائعة لأحدى الاعضاء المميزين في السفر لمدينة طرابزون 

آلسلام عليكم، نتمناكم جميعآ بخير دائما ^_^، من بعد اذنكم، صراحة حبينا نشارككم تفاصيل رحلتنآ كتجربة بمدينة طرابزون، زوجين و طفلتين لسا صغار، ٣ سنوات و أقل من سنة ") 👨‍👩‍👧‍👧

اول شيء، عند قررنا نطلع كان قرار صعب عشان الاطفال و لكن الحمد لله صحيح كان في صعوبة و لكن بفضل الله تجاوزنا اغلب الامور و انبسطنا، طلعنا مع مجموعة سياحية و شركة سياحية كتير محترمة، يلّي وعدونا فيه و جدناه امامنا و يمكن افضل، يلي بحب يستفسر عنها ما في مشكله ولكن نتحّفظ على الاسم لتجنب الدعاية آلعامة مع انهم يستحقون كل الخير ")🏖🏞⛺️

طلعنا بطيران سياحي✈️، من مطار الملكة علياء بعمّآن و نحنا من فلسطين🇵🇸، الفتره، الجو، و المناخ مقبولين، مع وجود رطوبة عالية، بعض الايام كانت غآئمة☁️🌦 و بعضها كانت مشمسة☀️🌤، مآ كتير رآح نحكي عن الأكل و المطاعم لأنهآ بتضل ضمن التفضيلات الشخصية 🍲🧀🍔🍟

تانيا، الفندق كان لطيف جدآ جدآ جدا🏨، سوِيت صغير لعائلة صغير، نظافة بالقمة، و الموقع ما كتير افرق معنا لانه كنا من ضمن مجموعة، و باصات الرحلات تجي لمدخل الفندق🚎🚌، لكنه لطيف كان ١٠ دقائق من المطار وايضا ١٠ دقائق ل ١٥ دقيقة من الميدان في حالة الزحمة، بمنطقة " Konaklar" ... قريبة بالاتجاه التاني من منطقة "Pelitli"

 ١- بدأنا الرحلة بيوم الوصول بعد الراحة لنحاول نستغل الوقت، زرنا "trabzon akvaryum" مكان لطيف و جميل و لكنه أصغر من يلي موجود بانطاليا 🦈🐡🐠🐟🐙

 

٢- اليوم التاني، اول يوم للرحلات، زرنا مدينة اوردو "Ordu" ---- شاطئ البحر الاسود، و كافيه مباشرة على الشاطئ  "Tirebolu Tarihçesi" 🏞 ثم، قلعة غيرسون "Giresun Castle🏰 " و اطلالة رهيبة على الجانبين، البحر و اليابسة و جزيرة غيرسون "Giresun Island🏝" يلي كانت المنطقة التالته في الزيارة، رحلة ذهاب و إياب بالسفينة 🚢 للجزيرة كتير رائعة مع جولة على الجزيره، ثم اخيرا تلفريك مدينة اوردو🚡، لطيف، و خفيف مع الصعود لقمة الجبل و هناك في أسواق للبندق بكل مراحله من الزراعة حتى تصنيع زبدة البندق و الشوكولاته🌰🌳🍫

في مطاعم مع اطلالات رهيبة للي بيحبوا الاكل التركي ^_^ 🥗🥘🍲🥟

اليوم التاني، اقتصر على شلالات و بحيرة أوزنجول🏞، كتير كتير مكان رائع، للاسف قَدرنا كان الجو ضباب في المناطق المرتفعة فاطلالة البحيرة من القمة ويلي منتشره كتير كورة على النت، كانت صعبة ما توفقنا برؤيتها ولكن مشاهد الشلالات و البحيرة و المشي على جوانبها جدا لطيفة، و انتهت الجولة لزيارة مصانع محلية للشاي و الحلويات🫖🧁🍫🍰..

الرحلة الثالثة، كانت مرتفعات و شلالات ايدر⛰️🏔، وقت ممتع جدآ و فطور على هضبة ايدر مع اطلاله لطيفة🍱، مطاعم باطلالات حلوة جدا على الوادي و الشلالات، الجسور العثمانية في الطريق، اكواخ على الجانبين للمبيت او للمبيعات🏡🏠🏡، كتير المكان خرافي وتجربوا فيه كتير أشياء، المراجيح المعلقة، الخطوط الواصلة أطراف النهر ، ورياضة ال rafting  لمدة ٣٥ - ٤٥ دقيقة، جميلة جدا و بتستحق التجربة ^_^🫣

الرحلة الرابعة، بداية مطل تورول الزجاجي، هضاب زيغانا "سويسرا طرابزون"🐂🐄🌄، و قرية هامسي كوي🏘🏡، تجربة حلو السوتلاتش، أو الرز بالحليب المشهورة في القرية🥧، صراحة ما زرنا دير سوميلا لانه بحاجة لصعود ١٠٠٠ درجة و كان معنا أطفال، لكن الحمد لله انبسطنا بما رأينا💖🌸⚘️

 اخر جولة كانت مرتفعات حيدر نبي الساحرة و الربيع الجميل جدا، ثم مغارة تشال و اخيرة بحيرة سيرا ⛰️🏞

نزلنا يومين على الميدان متل ما نصحتونا⏰️🏙🌆، مآ كتير اشترينا اشياء، جربنا اكل جديد و انبسطنا بالمكان، زرنا جواهر مول في العاب للاطفال ")👧🏻👶🏻

الصور المرفقة من جولتها و الحمد لله روحنا على خير وعلى الجسر ونحنا نازلين لفلسطين نسينا انه انبسطنا من النكد و التعب يلي عانيناه على المعابر 🫠🤭 و شكرا ⚘️